पोखरा : पोखरा क्षेत्रीय अन्तर्राष्ट्रिय विमानस्थल निर्माणले तीव्रता पाएको छ। पहिलो चरणमा जमिन कटान र सम्याउने काम गरिरहेको चिनियाँ ठेकेदार कम्पनी सीएएमसीईको टोलीले पाँच प्रतिशत काम सकिसकेको आयोजना प्रमुख विनेश मुनकर्मीले बताए। जेठ महिनाभित्र ८० प्रतिशन जमिन सम्याउने काम भइरहेको हो। वर्षाको समयमा जमिन सम्याउन अप्ठेरो हुने भएकाले त्यतिबेला टर्मिनल बिल्डिङ र धावनमार्ग निर्माणको काम गर्ने सीएएमसीईका जनसम्पर्क अधिकृत कृष्ण चापागार्इंले जानकारी दिए। निमार्णमा चिनियाँ ३० र नेपाली १ सय ५० जना मजदुर खटिएका छन्। जमिन सम्याउन ट्रिपर २६, एक्साभेटर ६, डोजर ३ र रोलर ४ वटा प्रयोग भइरहेको छ। ‘निर्माणलाई थप तीव्रता दिन चीनबाट ल्याइएका थप ४० वटा ट्रिपर, रोलर, एक्साभेटर, डोजरलगायत निर्माण सामग्री भारतको कोलकाता बन्दरगाहमा आइसकेका छन्’, कम्पनीका जनसम्पर्क अधिकृत चापागाईंले भने। एक महिनाभित्र कोलकाताबाट निर्माण सामग्री आएपछि कामले थप तीव्रता पाउने पनि उनले सुनाए।
स्थानीय सरकार, स्थानीय नागरिकले देखाएको व्यग्रता र सहयोगले निर्माणमा तीव्रता आएको चापागाईंले बताए। कुनै बाधा नआए र सबै क्षेत्रबाट यस्तै सहयोग रहिरहे तोकिएको मितिभन्दा ६ महिनाअघि नै विमानस्थल पूरा गरेर नेपाल सरकारलाई हस्तान्तरण गरिने उनले सुनाए। सरकारले सन् २०१४ मे १२ मा चिनियाँ ठेकेदार कम्पनी सीएएमसीईलाई ठेक्का दिएको थियो। निर्माण गर्ने र निर्धारित समयमा नसके क्षतिपूर्तिसमेत सरकारलाई दिनुपर्ने सर्त भएको इपीसी मोडलमा सीएएमसीईले ठेक्का लिएको हो। निर्माण कम्पनीले २०२१ को जुलाई १० मा विमानस्थल सम्पन्न गरी नेपाल सरकारलाई हस्तान्तरण गर्नु पर्नेछ। प्रधानमन्त्री केपी शर्मा ओलीले २०७३ वैशाख १ गते विमानस्थलको शिलान्यास गरेका थिए। त्यसअघि उनकै चीन भ्रमणका बेला चैत ८ गते विमानस्थल निर्माणका लागि दुई देशीय ऋण सम्झौता भएको थियो। झन्डै २२ अर्ब रुपैयाँ ऋण चिनियाँ एक्जिम बैंकले नेपाल सरकारलाई विमानस्थल निर्माणका लागि लिने भएपछि काम सुरु भएको थियो।
पोखराको वडा नं १४, १८ मा पर्ने झन्डै ३७ सय रोपनीमा अन्तर्राष्ट्रिय विमानस्थल निर्माण कार्य भइरहेको छ। सरकारले २०३१ र हालै गरी दुई चरणमा त्यति जमिन अधिग्रहण गरेको हो। हालै अधिग्रहण गरिएको ५ सय २१ रोपनी जग्गाको मुआब्जा वितरण सकिएको जानकारी आयोजना प्रमुख मुनकर्मीले दिए। विमानस्थलको पेरिफेरिमा रिङरोड बनाउन सरकारले पछिल्लो समय अधिग्रहण गरेको ६० रोपनी जग्गाको मुआब्जा वितरण गर्न बाँकी छ। यसका लागि सरकारले १ अर्ब ५० करोड बजेट छुट्याएकाले छिटै नै मुआब्जा वितरण गरिने पनि उनले बताए। अन्तर्राष्ट्रिय उड्डयन संस्था (आईकाओ) को मादण्डअनुसार फोरडी मोडलमा पर्ने पोखरा विमानस्थल निर्माण पूरा भएपछि बोइङ ७५७ र एयरबस ३२० वा सोसरहका जहाज आउजाउ गर्न सक्नेछन्। २५ सय मिटर लामो धावनमार्ग हुने विमानस्थलमा आउनेजाने ती विमानको यात्रु क्षमता २ सय हुनेछ।
साभारः अन्नपूर्ण पोष्टबाट
No comments:
Post a Comment